Мэдээ, мэдээлэл / admintaf / 07/11/2017

“МАШИН УГААЛГА” цуврал нийтлэл #5 төгсгөлийн хэсэг

Авлигын пирамидын орой

Ерөнхийлөгч Луйс Инасио Лула да Силва бол бразилчуудын бахархал. “АНУ-д Обама байгаа бол бидэнд Лула бий” хэмээн домогт хөл бөмбөгч Пеле хэлж байсан удаатай. Тэд Лулагаа Бразилийн Нильсон Манделотой зүйрлэнэ. Лула 1945 оны 10-р сарын 25-нд найман хүүхэдтэй айлын долоо дахь хүү болон мэндэлжээ. Багаасаа гудамжинд хар бор ажил эрхлэн амь зогоож өссөн түүнд системтэй боловсрол эзэмших боломж гарсангүй. Идэр залуу насандаа үйлдвэрийн ослоор хуруугаа тасдуулсанаас хойш Үйлдвэрчний эвлэлд хамрагдан ажилчдын эрх ашгийг хамгаалан тэмцэх болжээ. Чухам энд л тэрээр эзэдтэй яриа хэлэлцээрт орж, олон нийттэй харилцан, жагсаал тэмцэл зохион байгуулах чадварт суралцан өөрийгөө нээсэн гэдэг. Лула маш сайн зохион байгуулагч, уран илтгэгч төдийгүй маргаан зөрчлийг шийдвэрлэн тохиролцоо хийхдээ гаргуун нэгэн. Хөдөлмөрчдийн намын нэрийн өмнөөс гурван удаа Ерөнхийлөгчийн сонгуульд нэр дэвшин өвдөг шороодсон ч үл цөхрөн дөрөв дэхь удаагаа өрсөлдөн сонгогдож 2003 оноос 2011 он хүртэл хоёр удаагийн бүрэн эрхийн хугацаанд Ерөнхийлөгчөөр амжилттай ажилласан түүхэн хүн юм.

Лулаг Бразил төдийгүй дэлхий дахинаа мэднэ. Ерөнхийлөгч Лула нийгмийн хамгаалалд онцгой анхаарал хандуулан “Лулизм” урсгалыг улс төрд оруулж ирсэн гэдэг. Түүний санаачилгаар гэр бүлийг дэмжих “Болса Фамилиа”, өлсгөлөнг тэглэх “Фоме Зеро” хөтөлбөрүүд хэрэгжиж, хүүхдүүдээ сургуульд оруулж, вакцинд хамруулах болзолтойгоор ядуу гэр бүлд бэлэн мөнгө, хоолны талон олгож байв. Мөн “Миний гэр, миний амьдрал” хөтөлбөрөөр олон зуун ядуучуудыг орон байртай болгосон түүнд бразилчууд хайртай байхаас ч өөр аргагүй. Лулагийн нэр хүнд олон улсад ч өссөн ба 2010 оны “Тайм” сэтгүүлийн дэлхийн нөлөө бүхий 100 улс төрчдийн нэгээр шалгарч байв. Түүнийг Ерөнхийлөгчөөр ажиллах найман жилд Бразил Улс дэлхийн найм дахь эдийн засаг болон хүчирхэгжиж 2014 оны Дэлхийн хөл бөмбөгийн аварга шалгаруулах тэмцээн, 2016 оны Зуны Олимпийг эх орондоо зохион байгуулах эрхийг авч чадсан гайхам түүхтэй.

Гэхдээ энэ бүхний цаана эргэлзээ төрүүлэхүйц олон асуудал нуугдана. Ядуурлаас гаргах хөтөлбөрүүд болон Дэлхийн хөл бөмбөгийн ба Олимпийн бүтээн байгуулалтыг бүгд л “16 Клуб”-ынхан төртэй гэрээлэн гүйцэтгэсэн байдаг. Арай тэднийг санхүүжүүлэх гэж энэ бүхнийг бодож олсон юм биш байгаа гэлтэй. Эцсийн дүндээ Лула хэний төлөө ажилласан хэрэг вэ? Тэр үнэхээр ард түмнийхээ төлөө зүтгээ юу, эсвэл өөрийнхөө нэр төрийг мандуулан бадрааж, эрх мэдлээ бататган тогтоохын төлөө ядуусын хайртай эцгийн дүрд тоглоо юу? гэсэн асуулт өнөөг хүртэл маргаан дагуулж, олон нийтийг хуваасаар л байна.

Ард түмэн хайртай хүндээ хэр барагтай бол хир халдаахыг хүсдэггүй бололтой. Лулагийн авлигатай орооцолдсон явдал Ерөнхийлөгчөөр сонгогдсон эхний үеэс л нийтэд ил болоод байв. Гэсэн ч 2006 оны сонгуулиар түүнийг дахиад л сонгожээ. Тэр ч бүү хэл 2011, 2014 онуудад түүний гарынх нь хүн буюу Ерөнхийлөгчийн Тамгын газрын даргаар ажиллаж байсан Дилма Руссефийг удаа дараалан сонгосон билээ. Лула ч сонгуулийн сурталчилгаанд нь өөрийн биеэр зүтгэж “Та нар надад итгэдэг шигээ Дилмад итгээрэй” хэмээн олон түмнийг хошууруулж явлаа.

2016 оны эхээр “Машин угаалга” ажиллагааны явцад Лулагийн авлигатай холбоотой хэрэг сүрхий илчлэгдээд эхлэх үед тэрээр сандран Ерөнхийлөгч Дилмагийн Тамгын газрын даргаар томилогдчихсон удаатай. Улс төрийн дархлаатай албан тушаалд очсон түүнийг хэвлэлээр “Лула хүү Дилма охины хормойн дор ороод нуугдчихлаа” хэмээн шоглон зурж байв. Харамсалтай нь хуулийн байгууллагаас томилгоог хүчингүй болгосноор Лулагийн дүүжигнэж үлдсэн сүүлчийн олс ганцхан хоногт тасарчихав.

2016 оны 3-р сарын 4-нд Лулагийн гэрт нэгжлэг хийж, түүнээс мэдүүлэг авчээ. Лулагийн эзэмшдэг хоёр байр нь түүний дотны найз Бумлайн нэр дээр байдаг ч Лулагийн хөрөнгө болохыг шүүгч Моро тогтоон олон нийтэд мэдээлсэн байна. Мөн Лулагийн эхнэрийн нэр дээр ч багагүй хөрөнгө гарч ирлээ. Лулагийн нэрээр нэрлэгддэг “Лула Институт”-д хийсэн санхүүгийн аудитын шалгалтаар хууль бус гүйлгээ удаа дараа хийж байсан нь тогтоогджээ. Хүүхдүүдийнхээ эзэмшдэг компани руу 1,3 сая реалын төлбөр хийсэн баримт нь ч олдов.2011-2014 оны хооронд “16 Клуб”-ээс 35 сая реал Лула институтад шилжсэн байсныг мөнгө угаах гэмт хэргийн илрэл хэмээн Прокурорын газраас үзжээ.

Түүнээс хойш жил гаруйн дараа буюу 2017 оны 5-р сарын 11-нд Моро шүүгч Лулаг дуудан таван цаг байцаалт аваад мөн суллажээ. Эл өдөр Лулаг хамгаалсан иргэдийн жагсаал Куритивад өрнөсөн бөгөөд байцаалтаас гарч ирсэн Лула тэдний өмнө үгээ хэлж, нэр хүндээ улам өсгөөд амжив. Тэрээр 2018 оны Ерөнхийлөгчийн сонгуульд нэр дэвшинэ гэдгээ ч зарлаж буй. Тиймээс өөрийнх нь эсрэг энэ мэт улс төрийн явуулга зорилготой хийгдэж байна хэмээн мэдэгдсээр байгаа билээ.

Сүүлийн үеийн судалгаагаар ялангуяа ядуурал ихтэй хойд нутгаар Лулагийн нэр хүнд өндөр хэвээр байгаа мэдээ байна. Магадгүй, ард түмэн нийгмийн халамжаа санагалзаа биз.

Хааяа шүүгч Моро эргэлзэнэ. Тэрээр бага залуу наснаасаа 1990 оны эхээр Италид өрнөсөн авлигын эсрэг “Цэвэр гар” операцийг сонирхон судалж ирсэн. Хуулийн байгууллага улс төрийг тухайн үеийн авлигачдаас чөлөөлсөн ч үр дүнд нь өөр нэг авлигач Силвио Берлускони Ерөнхийлөгчөөр сонгогдчихсон нь тун харамсалтай. Тиймээс “Машин угаалга” зорилгодоо хүрч, зад угаалаа ч гэлээ бохирдсон улс төрийн чанарыг сайжруулж чадах болов уу гэдэг асуудал сэтгэл зовоосон хэвээр үлдлээ. “Миний ажил бол үнэн зөвийг шүүн тогтоох, харин улс төрийг би мэдэхгүй” хэмээн Моро хариулдаг. Үнэхээр тийм л дээ. Шүүгч хүн авлигач улс төрчдийг цээрлүүлэн шоронд хорьж чадна, харин шударга улс төрчдийг Парламентад суулгаж чадахгүй.

Моро шударга ёсыг тогтоохын төлөө амь насаараа дэнчин тавин ажилласан нь үнэн. Гэр бүлтэйгээ өнгөрөөх цаг зав хомсдож, хүүхдүүдтэйгээ хамт салхилах, дугуйгаар явах, эхнэртэйгээ гадуур хооллохоо ч болиод удаж байгаа. Такси дуудах нь байтугай машинаа жолоодохоо ч больжээ. Түүний гэрт хамгаалагч нар өдөр, шөнөгүй ээлжлэн харуулд гарна. Тэрээр өдөр бүр таашаал авдаг хувийн эрх чөлөө, орон зайгаа бүгдийг золиослон байж зүтгэсэн. Харин үр дүн... яаж гарах бол???

“Машин угаалга”-ын үр дүнг үнэлшгүй. Дээд шүүхийн шүүгч Теори Заваскийн хэлснээр “Дэлхийн аль ч оронд байгаагүй схемжсэн улс төрийн хулгайг илрүүлсэн юм”. Мэдээж үр дүнг нь нийт бразилчууд хүртэнэ. Бас ирээдүй хойч үе нь талархаж явах биз ээ.

“Машин угаалга” номын эхний дэвтэр ийнхүү өндөрлөж байна. Мэдээж, удаах дэвтэр бичигдэж байгаа. Гэхдээ дараагийн номыг үл хүлээн, сүүлийн жилд ямар үйл явдал өрнөснийг энд цухас дурьдсугай.

“Машин угаалга” ажиллагааны гол гогцоо хүн, мөнгө угаах гэмт хэргийн их мастер Алберто Иойссеф үнэнээ мэдүүлэн, ялаа хөнгөлүүлж чаджээ.

-Та шоронгоос гараад мөнгөгүй хэрхэн амьдрах билээ? гэсэн сэтгүүлчийн асуултад тэрээр

-“Мөнгө бол сонин биш, орж л байдаг, гарч л байдаг. Хэрвээ надад мөнгө хэрэгтэй бол хуушуур зараад ч амьдралаа эхлүүлж чадна. Миний багадаа сурсан ажил. Харин Бразилийн мөнгөтэй нь ялдаг сонгуулийн тогтолцоог өөрчлөөгүй цагт мөнгө угаах энэ мэт схемийг үндсээр нь таслан зогсоож чадахгүй. Улс орон ч хөгжин дэвших арга зам байхгүй. Надад шүүгч Мород өширхсөн зүйл байхгүй харин ч түүнийг үнэлдэг. Би буруу зүйл хийсэн тул шоронд орсон нь үнэн. Энэ бол зүгээр л тоглоом. Амьдралын энэ мэт тоглоомд оролцож сурсан хүмүүс бол юу ч тохиолдож болзошгүй гэдгийг угаас мэддэг. Хэдийгээр миний эсрэг ч гэсэн хуулийн багийнхан үнэхээр сайн ажилласан” хэмээн хариулсан гэдэг. 2016 оны 5-р сард шүүгч Сержио Моро “Тайм” сэтгүүлээс шалгаруулсан дэлхийн шилдэг 100 манлайлагчдын нэгээр шалгарсан бөгөөд тухайн үед түүнд байцаагдаж байсан Иойссеф баяр хүргэж, гар барьсан удаатай.

2016 оны 3-р сарын 7-нд “16 Клуб”-ын нөлөө бүхий гишүүн, Одобрешт группын үе дамжсан эзэн Марсело Одобрешт Петробрас ТӨК-ийн удирдлагууд болон улс төрчдөд 30 сая ам.долларын хахуул өгсөн хэргээр 19 жилийн ял авчээ.

Бразилийн Дээд шүүхийн шүүгч Теори Заваский 2017 оны 1-р сарын 19-нд онгоцны ослоор эндэн зуурдаар нас барсан байна. Тэрээр 200 гаруй улс төрчид, бизнесийн толгойлогч нарын хэргийг шүүж байсан юм. Түүний осол санамсаргүй тохиолдол байгаагүй хэмээн үзэх хүмүүс ч бий.

Ерөнхийлөгч Дилма Руссефийг огцорсоны дараа халааг авсан Ерөнхийлөгч Мишел Темер хүртэл нэг бус авлигын хэрэгт орооцолдоод буй. Бразилийн махны аварга үйлдвэр “JBS”-ийн удирдлагуудаас хэдэн сая ам.доллар авсан гэх ба тэдний хоорондын утасны яриа ч олон нийтэд ил болжээ. Гэсэн ч Темер энэ бүхнийг үгүйсгэсээр байгаа. Тэрээр жилийн дараа болох Ерөнхийлөгчийн сонгуульд нэр дэвшихгүй гэдгээ зарлаж, үлдсэн хугацаанд улс төрийг тогтворжуулан, эдийн засгийн өсөлтийг нэмэгдүүлэхийн төлөө ажиллана гэдгээ удаа дараа илэрхийлсэн. Бразилийн эдийн засаг ч сэргэж байгаа сайхан мэдээтэй.

Харин ядуусын хайртай эцэг, Ерөнхийлөгч асан Лула да Силва тун саяхан Сержио Мород шүүгдэж 9,5 жилийн ял авчээ. Тэрээр улс төрийн зорилготой, хуурамч хэрэгт хилсээр яллагдсан хэмээн үзэж байгаа тул түүний өмгөөлөгчид дээд шатны шүүхэд давж заалдахаа мэдэгдээд буй.

Төгсгөлийн оронд

Бразил Улс 200 гаруй сая хүнтэй, 8,5 сая хавтгай дөрвөлжин газар нутагтай. Газар нутгийн хэмжээгээрээ ч, хүн амын тоогоороо дэлхийд айргын тавд ордог том гүрэн.

Манай хоёр орны газар нутгийн хэмжээ, хүн амын тоо, эдийн засгийн цар хүрээ ялгаатай ч бидэнд ижил төстэй зүйлс олон бий. Юуны өмнө ардчиллын замаар шинэ тутам замнасан бөгөөд засаглалыг бэхжүүлэх, авлигыг бууруулах, ил тод байдал, иргэдийн оролцоог сайжруулах тал дээр харилцан суралцах зүйлс асар их. Өөрөөр хэлбэл манай хоёр улс яг л адилхан зовлонтой мэт санагддаг.

Монголчууд “Эвтэй байхдаа хүчтэй” хэмээн хэлэх дуртай. Эв нэгдэл гагцхүү шударга ёсон дээр суурилж байж тогтвортой, бат бэх байдаг. Харин ардчилсан нийгэмд хуулийг хэрэгжүүлж, шударга ёсыг сахин мануулах үүргийг шүүх хүлээдэг. “Хараат бус” шүүхийн засаглалтай улс оронд авлигачид оршин тогтнох боломжгүй. Шүүх нь нийтийн эрх ашгийг хамгаалан, авлигачдыг цээрлүүлээд эхлэхээр ард түмэн ч гэсэн “шударга” шүүгчдээ хамгаалаад эхэлдэг юм билээ.

“Машин угаалга” операци богино хугацаанд хэрхэн үр дүнд хүрч байгааг нүдээр харж, биеэр мэдэрсэн хүний хувьд авлигын эсрэг ийм нэгэн амжилттай тэмцлийг Та бүхэнтэйгээ хуваалцахыг зорьсон билээ. Хэрвээ уншигчдын сонирхлыг татах аваас “Машин угаалга” номыг Монголд хэвлүүлж болохыг дуулгахын сацуу тус номыг бүрэн эхээр нь португаль хэлнээс хөрвүүлэхийг зорьж буй дипломатч Ц.Өнөржаргалд талархах нь зүйтэй болов уу. Мөн түүнчлэн тус номын зохиогч Владимор Нето, шүүгч Сержио Моро нарыг урин туршлагаас нь хуваалцах боломжтойг ч дуулгахад таатай байна.

Эцэст нь өгүүлэхэд Монголын хэвлэл мэдээллээр шуугиад байгаа оффшор данстай төрийн өндөр албан тушаалтнууд, 60 тэрбумаар төрийн албыг худалдах тухай төлөвлөгөө ... яг л мөсөн уулын орой мэт ил нэг гарч, далд нэг ороод байх шиг... Монголын ард түмэн мөсөн уулын их биеийг харж чадахгүй байгаа ч өдрөөс өдөрт мэдэрсээр байгаа билээ. Авлигад автсан төрдөө бухимдсаар буй иргэдийн хүсэл зоригийг гүйцэлдүүлэн, үнэнийг илчлэх Сержио Моро шиг эр зоригтой, шударга шүүгчид эх оронд минь олон буй гэдэгт миний бие итгэдэг. Монголын ард түмэн авлигын эсрэг эвлэлдэн нэгдэж чадна гэдэгт эргэлзэхгүй байна.

Ч.Сосормаа

Мэдээ, мэдээлэл / admintaf / 06/11/2017

"Машин угаалга" цуврал нийтлэл #4

Шорон хүнийг өөрчилдөг

“Машин угаалга” операцийн долоо дахь ажиллагаа эхлэв. 2014 оны 11-р сарын 14-нд Холбооны 300 цагдаа, санхүүгийн хяналтын хорооны 50 хүний бүрэлдэхүүнтэй баг гарч нэг өдөр нэжгээд компаниудын захирлыг баривчлав. Нийт 49 аж ахуйд нэгжлэг хийж, 29 сая реалтай тэнцэх мөнгийг дансанд нь царцаан 25 хүнийг хорьжээ. Ихэнх нь улс орондоо толгой цохих баячууд байлаа. Тэдний дотор “16 Клуб”-ын долоон компаний захирлууд оржээ. Тэд Петробрастай хийсэн 60 тэрбум реалын гэрээнд сэжиглэгдээд байлаа. Петробрас ба эдгээр компаниудын хооронд мөнгө угаах үүргийг “Зөвлөх” нэртэй компаниуд гүйцэтгэдэг болохыг гэрчүүд баталгаажуулсан байдаг. Зөвлөх компанийн үйлчилгээг үнэлэх эсвэл хэмжих хэмжүүр байхгүй тул ийм нэртэй компаниар дамжин бохир мөнгө байнга эргэлдэнэ. Үүнийг батлах ганцхан жишээ дурьдахад 2009-2013 оны хооронд эдгээр зөвлөх компаниудад 500 сая реал шилжжээ. Энэ тоо цаашид ч улам өсөх нь дамжиггүй.

Захирлууд баривчлагдах үедээ гайхалтай тайван байв. Тэд өөрсдийгөө удахгүй суллагдана гэдэгт итгэлтэй байсан биз. Харин тусгай онгоцонд тэдний хувцасыг тайлуулан, биед байгаа бүхнийг хураамагц ихэд эвгүйрхсэн гэдэг. Нүцгэн шахуу биендээ таар нөмрөн гавлуулсан хүмүүс үүрийн таван цагт Куритива хотод буув. Урьдчилан хорихын өрөөндөө орохоос өмнө тэдэнд шүдний оо, сойз бас цамц өгчээ.

Захирлуудыг олноор хорих болсон тул шоронгоо зайчлан хар тамхины хэрэгтэй хоригдлуулыг өөр мужийн шорон уруу шилжүүлсэн байв. 12 шоо дөрвөлжин нэг өрөөнд дөрвөн хүн хоригдоно. Унтах дэвсгэр, бяцхан ширээ, бие засах өрөө тэгээд л болоо. Чийг ихтэй тул угаасан хувцас мөддөө хатахгүй. Бүх хоригдлуудын дунд хоёрхон шүршүүртэйгээс усанд орох гэж дугаарлана. Бусад хоригдлуудтай адил хар шоштой будаа, тахианы мах төдийгөөр голоо зогооно.

Насаараа тансаг хэрэглээнд дассан баячууд балмагдан цочирдов. Хоёр нь уйлж, нэгний даралт өндөрсөж, нөгөө хэд нь таг дуугүй гөлийн сууна. Тамхи татдаг нөхөрт тэвчих нь маш хүнд байлаа. Маргааш нь тэдний өмгөөлөгч нар ирж, хамгийн үнэтэй дэлгүүрийн тансаг дотуур хувцас авчирч өгцгөөсөн аж. Харин захирлуудын хамгийн түрүүнд гуйсан зүйл бол унших ном. Чингээд тун удалгүй тус хорих анги хамгийн үнэтэй, сонгодог номын сантай болов.

Бразилийн магнай компаниудын удирдлагуудыг олноор нь баривчилсан анхны тохиолдол энэ бөгөөд нэр хүндтэй компаниудын бизнесийг гацаан улмаар эдийн засгийг боомилж, ажилгүйчүүдийн тоог нэмэгдүүлэх аюултай хэмээн зарим хэвлэлээр шүүмжилж эхэллээ. Эдгээр захирлуудын удирддаг аж ахуйн нэгжүүд ойролцоогоор сая орчим ажлын байрыг бүрдүүлдэг байсан нь тэдний өөрсдийгөө хамгаалах хамгийн сүүлчийн зөвтгөл байсан бололтой.

Удалгүй шүүгч Морогийн гараас амархан мултрахгүйгээ мэдмэгц үлдсэн компанийн захирлууд сайн дураар мэдүүлэг өгөхөөр Куритивыг зорьж иржээ. Үе дамжсан бизнесийн магнат Сержио Мендез гэхэд баривчилгааны онгоцонд гавлуулан очихоос эмээн өөрийн тансаг онгоцондоо суун Куритива руу нисэн очиж мэдүүлгээ өгсөн байдаг.

Тэдэнд бүх үнэнээ мэдүүлэн, ялаа хөнгөлүүлэх ганцхан боломж байгааг өмгөөлөгчид нь сануулсаар байлаа. Моро шүүгчийн хатуу гараас мултрах өөр гарц ч байсангүй.

Петробрасын Үйлчилгээний газрын захирлын гэрээс 153 ширхэг дэлхийн алдартай уран зураг олдсон бол бусад компанийн захирлууд болон улс төрчдийн гэрээс ч мөн төдий хэмжээний уран зургуудыг хураан авчээ. Урлагийн үнэт эдлэл цуглуулах нь авлигын мөнгөө шингээх бас нэг арга аж. Эдгээр урлагийн ховор нандин бүтээлүүдийг Куритива хотын Оскар Нимейерийн нэрэмжит Уран зургийн музейд шилжүүлсэн нь эдүгээ жуулчид олноороо зочлон нүд хужирлах тансаг үзэсгэлэн болсон юмдаг.

Одебрешт

Одебрешт Холдинг бол үндэстэн дамнасан Бразилийн хамгийн том барилгын компанийн нэг юм. Эзнийхээ овгоор нэрлэгдэх гэр бүлийн энэхүү нүсэр байгуллага 1944 онд төрсөн түүхтэй бөгөөд эдүгээ гурав дахь үеийн залуу эзэн Марсело Одебрешт удирдан ажиллана.

Өмнөд ба Хойд Америк, Европ, Африк, Ойрхи Дорнодын орнуудад барилга, дэд бүтцийн чиглэлээр үйл ажиллагаа явуулдаг 49 охин компанитай, 181 мянган ажилчидтай, жилдээ 31 тэрбум ам.долларын орлоготой нүсэр байгууллагын эзэн, “16 Клуб”-т гол нөлөөтэй оролцдог Марсело Одебрештийг цагдаагийнхан аль хэдийнэ онилчихсон байлаа.

Холбооны цагдаагийн газраас тэдний 16 давхар төвийн байранд 2015 оны 6-р сард

нэгжлэг хийжээ. Албан өрөөнүүдийн холбоо харилцааг тасалж, орох гарах бүхий л гарцыг хаан, ариун цэврийн өрөөнүүдийг хүртэл түгжсэнд ажилтнууд нь бүгд айн цочирдож байв.

Цагдаагийнхны дараагийн гүйцэтгэх ажиллагаа бол эзэн Марсело Одебрештийг баривчлах явдал. Бразилийн тэргүүн 10 баяны нэг, 10 тэрбумын хөрөнгөтэй Марсело нь Сан Пауло хотын 30 сая реалын хамгаалалт өндөртэй, тансаг хороололд амьдардаг. Тэрхүү хороололд 45 гэр өргөө байрлах ба Марсело хамгийн том харшийг эзэмшинэ. Цагдаагийнхан нисдэг тэргээр агаараас танадан байрлалыг нь тогтоон хэрхэн нэвтэрч, баривчлахаа ч төлөвлөв.

Өндөр хамгаалалттай хороололд орох боломжгүй тул зарах зар тавьсан нэг байшинг үзэх зорилгоор цагдаа нар дотогш нэвтэрчээ. Цагдаагийн ажилтнууд “BMW” унаж, баяны дүрд тоглон, ирээдүйн хөршүүдээ сонирхох нэрийдлээр Марселогийн байрыг эргэн тойронтой нь судалж амжив.

2015 оны 6-р сарын 19-ны Ням гарагийн өглөөний 6 цагт цагдаа нар хаалга тогшсон ба Марсело өөрөө үүдээ тайлжээ. Тэрээр өглөө бүр 5:30-д босож дасгал хийдэг зуршилтай тул амралтын өдөр гэлтгүй өглөөнийхөө сунайлтыг эхэлчихсэн байв. Нэг цагдаа нь түүнийг баривчлах шийдвэрийг үзүүлэн, утсаа даруй өгөхийг шаардахад:

-“Би дээшээ гарч эхнэртээ дуулгачихаад, гар утсаа аваад ирье” хэмээх түүнд

- “Энэ мөчөөс эхлэн таны дэргэд харгалзагч байнга дагалдана” гэдгийг ч хэлэв. Тэр даруй боссон эхнэр нь хоёр охиноо сэрээхгүйг хичээн чимээ шуугиангүйгээр хувцасыг нь бэлдээд харгалзагч цагдаад өгтөл тэрээр,

–“Марсело, та энэ мөчөөс эхлэн өөрийнхөө цүнхийг барих болно” хэмээжээ.

Марсело Куритива хотын шоронд ирээд ч сэтгэлийн ямар нэгэн хөдөлгөөн илэрхийлсэнгүй. Хүн бүртэй соёлтой харилцаж байсан ч багаасаа бусдад үүрэг өгдөг сурсан зангаа ч гээсэнгүй. Өмгөөлөгчөө дуудаад шууд үүрэг өгч эхэлжээ. Ихэвчлэн өмгөөлөгчид үйлчлүүлэгчээсээ асууж, зөвлөлдөж байдаг бол түүний өмгөөлөгч үг дуугүй сонсож, толгой дохино.

Тухайн өдөр газар бүрээс баривчлагдан ирсэн том компаниудын 12 захирал, гурван өрөөнд хуваагдан хоригдсон байна. Тэд бүгд хэвлэл мэдээллийнхэнээс нүүрээ нуудаг бол гагцхүү Марсело хэний ч өөдөөс толгой эгц харна. Сахилга бат чанд сахиж цагийн хуваарийг ягштал баримтална. Иднэ, уншина, бичнэ, дахиад иднэ, уншина, бичнэ. Хоёр цаг тутам овьёосны зутангаар хооллоно. Бразилийн хамгийн тансаг харшаас 12 шоо дөрвөлжин давчуу, хүйтэн, өрөөнд бусадтай шахцалдан хоригдож, хувийн орон зай, эрх чөлөөгөө алдсан хүний хувьд бол энэ асар их тэвчээр байлаа. Бусад нь царай зүс алдан, аль хэдийнэ гундаад эхэлжээ. Харин Марсело турсанаас өөрөөр өөрчлөгдсөнгүй.

Одобрештийг хоригдож байхад Швейцараас түүний компаний нэрээр шилжүүлсэн мөнгөний бүх мэдээллүүд ирсэн байна. Одобрешт Холдингоос Швейцарь, Панам, Монакогийн банкнуудын Петробрасын удирдлагуудын оффшор дансанд шилжүүлэг байнга хийдэг байжээ. Одоо түүнд үнэнээ хэлэхээс өөр арга алга даа.

Одебрештийн мэдүүлсэнээр түүний нэрийн өмнөөс улс төрчдийн 29 төрлийн оффшор дансанд 134 сая ам.доллар шилжүүлсэн аж. Түүнчлэн Дилмагийн 2014 оны Ерөнхийлөгчийн сонгуулийг зохион байгуулагч Жоао Сантанагийн оффшор данс руу 16 сая ам.доллар шилжүүлсэнээ ч хүлээв.

Ард түмний талархал

“Холбооны Цагдаагийн газар бол Бразилийн бахархал”, “Ард түмэндээ үнэнийг илчилсэн шүүгч Мородоо баярлалаа” гэх зэрэг хэвлэмэл хуудас барин жагссан 2,4 сая бразилчуудын жагсаал 250 гаруй хотод өрнөв. Бид “Машин угаалга”-ыг дэмжиж байна”, “Бид бүгд Моро” хэмээн тэд өөрсдийгөө нэрлэж байлаа. Өөрөөр хэлбэл ард түмэн шударга шүүгчээ хамгаалан жагсаж байсан юм.

Сержио Моро амралтын тэр өдөр сурсан зангаараа хоол хүнсээ цуглуулахаар гэр бүлтэйгээ дэлгүүр ортол “Шүүгч Моро энд явна” хэмээн дэлгүүрийн ажилтан чанга яригчаар зарлажээ. Тэнд байсан бүх хүн Мород талархан алга нижигнүүлэн удтал ташсан гэдэг. “Бид бүгд таны талд байна, Та бол Бразилийн бахархал. Миний үр хүүхдүүд үеийн үед танд талархаж амьдрах болно” хэмээн хэлэх иргэдийн үгс тасрахгүй.

Моро шүүгч тэр жилдээ “Глобо” сэтгүүлийн оны шилдэг хүнээр шалгарчээ. Рио де Жанейро хотын нэрт Копакабана зочид буудалд уг шалгаруулалт болсон бөгөөд зохион байгуулагч нараас Мород таван одтой буудлын төлбөр ба нислэгийн тийз явуулахад тэрээр татгалзаж өөрөө энгийн өрөөгөө захиалан гэр бүлтэйгээ очжээ. Тэднийг танхимд орж ирэхэд бүгд бүчин авсан бөгөөд энэ үеэс л нөхрөө нэрд гарсан, олны хүндтэй хүн болжээ гэдгийг ойлгож эхэлсэн хэмээн эхнэр нь хожим дурсан ярьсан байдаг.

Шагнал гардуулах ёслолын үеэр Моро -“Шүүхээс авлигачдын нэрсийг ил болгосон нь ямар нэгэн улс төрийн зорилгоор популизм хийж байгаа хэрэг биш ээ. Харин олон нийтэд ил тодоор мэдээлж, ажлаа тайлагнаж байгаа юм. Хүн бүр хуулийн өмнө тэгш эрхтэй. Шүүх хэний ч талд орохгүй зөвхөн нотлох баримтыг үндэслэн шийдвэр гаргах үүрэгтэй. Ард иргэд гудамжинд жагсан цуглаж үзэл бодлоо илэрхийлж байгаа нь манайд ардчилал байгааг илтгэж байна. Барууны, зүүний эсвэл төвийн улс төрийн олон ургалч үзлээс үл хамааран бразилийн ард иргэд нэг зүйл дээр нэгдэж чадлаа. Энэ бол авлигын эсрэг тэмцэл юм. Бразилийн ардчилал цэргийн дэглэмийг ялж байсан түүхтэй. Авлигыг ч гэсэн бид ялж чадна. Ардчилсан засаглалыг боловсронгуй болгох ажлыг үтэр түргэн эхлүүлэх шаардлагатай байна, тэгвэл бид тайван замаар олон асуудлуудыг шийдвэрлэх боломжтой” хэмээн хэлжээ.

Үргэлжлэл бий.

Ч.Сосормаа

Мэдээ, мэдээлэл / admintaf / 03/11/2017

“МАШИН УГААЛГА” цуврал нийтлэл #3

Ард түмнээсээ хулгайлсан л бол буцаан төлөх л ёстой

2015 оны 3-р сарын 6-нд Ерөнхий Прокурор Жанен Үндсэн Хуулийн заалтын дагуу гишүүдийн нэрсийг зарлан хэрэг үүсгэв. Бразилийн түүхэнд улс төрчид ийнхүү олноороо нэг хэрэгт зэрэг холбогдож байгаагүй тул сар гаруйн хугацаанд бүх хэргийг амжуулан шалгаж, Конгрессийн гишүүдийн нэрсийг Дээд шүүхэд шилжүүлэх хэрэгтэй боллоо. Ерөнхий Прокурор “Би нэг л хэмжүүртэй түүгээрээ хэмжинэ. Түүнээс хэн байх нь надад хамаагүй. Тэр бол машин угаах ажиллагаанд шалгагдаж байгаа сэжигтнүүд гишүүдэд хахуулийн мөнгө өгсөнөө эсвэл харсанаа нотлох л юм бол шууд хэрэг үүсгэнэ” хэмээн мэдэгдэв. Үнэхээр түүний хэмжүүрээр хэн байх нь чухал биш нотолгоотой байх нь чухал.

2015 оны 3-р сарын 3-ны орой Ерөнхий Прокурор ажлын хэсгээс гаргасан дүгнэлтээ Дээд Шүүхийн шүүгч Заваскийд хүргүүлсэн байна. Дөрвөн хайрцаг бүхий нотлох баримтуудыгбуу агссан хамгаалалттай шүүхийн байранд авчрах үед сэтгүүлчид хэдийнэ шавжээ.

Одоо Дээд шүүхийн шүүгч Заваскийгээс бүх зүйл шалтгаална. Прокурорын яллах дүгнэлтэд 47 улс төрчдийн нэрс орсон ийм дуулиант хэрэг Дээд Шүүхэд ирж байсан түүх урьд өмнө байсангүй. Тиймээс нямбай шалгах нь мэдээж.

Улс төрчид үүрээ хөндүүлсэн зөгий шиг үймэлдэж эхлэв. Ерөнхий Прокурор нэр хүндтэй улс төрчид холбогдсон тухай сэтгүүлчдэд цухас дурьджээ. Түүнчлэн Дэд Ерөнхийлөгч Мишель Темертэй Ерөнхий Прокурор уулзах үедээ Конгрессийн Дээд ба Доод танхимын хоёр даргын нэрс холбогдсоныг ч хэлж. Дэд Ерөнхийлөгч гадагшаа явах ажлаа хойшлуулан Доод танхимын дарга, нам нэгт Эдвардо Куньяаг яаралтай дуудан уулзсан гэдэг. Ноён Куньяа өөрийгөө холбогдоно гэдгээ мэдэж байсан ч өөрийн чихээр нэрээ сонсмогц Ерөнхий Прокурорыг хараан зүхэж гарлаа. Харин Дээд танхимын дарга Рейно Галлейрос жагсаалтад хэний нэрс байгаа талаар мэдээлэл ирээгүй хэмээн сэтгүүлчдэд хариулсан бөгөөд ардчилсан улс оронд төрийн зүтгэлтнүүдийг шалгах бол хэвийн үзэгдэл гэдгийг ч онцлов. Харин маргааш нь өөрийн нэр уг жагсаалтад тэргүүлж байгааг мэдээллийн хэрэгслээр сонсоод шүүхийг шүүмжилж суулаа.

Бразилчуудын анхаарал одоо шүүгч Теори Заваский дээр чиглэж нэрсийн жагсаалтыг ил зарлахыг орон даяар хүлээжээ. Шүүгч маань шийдвэртээ гарын үсэг зурахын өмнө бүх нэрсийг дахин нягтлав. Туршлагатай шүүгчийн хувьд тэрээр маш тайвнаар бүх ажлаа дэс дараатай гүйцэтгэн оройн 20 цагийн алдад нэрсийг олон нийтэд зарлав. Нийт 49 хүний нэрс зарлагдсанаас 47 нь улс төрчид. Тэрхүү нэр төртэй 47 гишүүний 31 нь Хөдөлмөрчдийн намаас сонгогдсон Доод танхимын гишүүд аж. Тэр дундаа Конгрессийн хоёр танхимын дарга нэгэн зэрэг холбогдсон нь Бразилийн түүхэнд байгаагүй шившиг болов. Мөн түүнчлэн ялаа хөнгөлүүлэхийн тулд бүх үнэнээ өчиж, шүүхийн байгууллагатай хамтран ажиллахаа илэрхийлсэн Иойссеф ба Коста нарын мэдүүлгийг ч ил болгов.

Улс төрчид компаниудаас мөнгө шаардах нь сонгуулийн болон намын удирдлагыг сонгох үеэр улам ихэсдэг гэдгийг хэн хүнгүй гадарлана. Уул уурхай, барилгын компаниудаас хандив нэртэй мөнгө их хэмжээгээр авсан улс төрчид хариуд нь Петробрас ТӨК-ийн удирдлагуудыг өөрчлөхгүй гэдэг амлалтаа өгдөг. Учир нь тэд олон жил хоорондоо өгч авалцаад сурчихсан улс. Түүнчлэн Бразилийн дэд бүтэц, барилгын 16 толгой компаниудын бүлэглэл болох “16 Клуб”-ын бизнесийн асуудалд оролцохгүй, харин тэднийг дэмжиж ажиллана гэдгээ ч тохиролцдог гэнэ. Ийм хэв маяг бий болоод олон жилийг үдсэн тухай Иойссеф ба Коста нар нэг нь нөгөөгөө бататган мэдүүлэгтээ дурьдсан байдаг.

Авлигын мөнгөний хэмжээ гишүүдийн нам доторх нөлөөлөл, сонгуульт албан тушаалаас шалтгаалан янз бүр. Тухайлбал: Хөдөлмөрчдийн намын мужийн дарга нар 250-500 мянган реал сар бүр авах хуваарьтай. Үндэсний Дэвшлийн намын Конгрессийн гишүүдэд бол 10-150 мянган реалийн хаяц очно. Гишүүдийн өөрсдийн хүсэлтээс шалтгаалан бэлэн эсвэл дансаар нь шилжүүлнэ. Ихэнх нь бэлнээр гэртээ хүргүүлэхийг хүсдэг. Тиймээс Иойссеф ба түүний нөхдүүд цүнхтэй мөнгө зөөгөөд байнга л завгүй. Үндэсний Дэвшлийн намын дарга Жанен намдаа орж ирж буй хишгийг өөрөө мэдэж, гишүүдийнхээ мөнгөний хэрэгцээг шийдвэрлэх тул нам дотроо түүний нэр хүнд тун өсөв. Тэрээр сар бүр Иойссеф мэтийн хүмүүс уруу мессеж илгээнэ. Жишээ нь 5,5 Пиц гэвэл Жоао Пиццолити гишүүнд 550 мянган реал өг гэсэн үг. Сар бүр ийм л нууц дохиоллоор утас цохиход нэр бүхий гишүүний гэрт мөнгө даруй очно. Яг л үлгэрт гардаг шиг мөнгө өөрөө хаалга тогшино доо.

Хэний ч хүлээгээгүй оны төгсгөл

Бразилийн Конгрессийн Доод танхимын дэд дарга Андрей Варгас 2015 оны 4-р сарын 10-нд баривчлагдав. Тав хоногийн дараа Хөдөлмөрчдийн намын санхүүгийн дарга Жоао Нето ч байцаагдаж эхэллээ. Тэд Морог үзэн ядаж байсан нь гарцаагүй.

Ерөнхийлөгч асан Лулагийн дотны хүн, сенатч Делсидо до Амарал гэнэт баривчлагдлаа.

Тэрээр шоронд хоригдоод байсан Петробрасийн нэг захирал Нестор Сервирогийн хүү рүү утсаар залгаж “аавдаа миний тухай битгий хэлээрэй” хэмээн гуйжээ. Мөнгө ч амласан сурагтай. Харин хүү нь түүнтэй цаг гаруй ярилцсан утасныхаа бичлэгийг цагдаад аваачиж өгсөн аж. Ийнхүү өөрийгөө илчилсэн Делсидод гарах гарц үлдсэнгүй. Тэрээр 2016 оны 2-р сарын 11-нд хэргээ хүлээж, бүх үнэнийг өчин ялаа хөнгөлүүлэх гэрээнд гарын үсэг зурсан нь улс төрчдийн ялангуяа Лулагийн хувьд хар дарсан зүүд болов. Түүний байцаалт дөрвөн өдөр үргэлжлэн 2-р сарын 19- нд суллагдсан бөгөөд Ерөнхийлөгч Дилма Руссеф, өмнөх Ерөнхийлөгч Лулагийн тухай олон зүйлийг мэдүүлжээ. Дилмагийн Засгийн газрын гишүүд мэдээлэл өгч болохгүйг зогсоо зайгүй түүнд ятгаж байсан ч бүтсэнгүй. Делсидо суллагдсаны дараа Дилмагийн илгээсэн төлөөний хүнтэй уулзсан бичлэгээ хүртэл Прокурорын газарт илгээжээ.

Делсидо мэдүүлэгтээ авлигын схемийг Лула мэддэг байсан төдийгүй пирамидын орой дээр нь сууж, удирддаг байсан тухай хэлжээ. Тэр ч бүү хэл Сан Пауло хотноо Лула өөрийн намын нөхдийн хамт “Машин угаалга”-аас үүдэлтэй улс төрийн хямралыг эртхэн зогсоох талаар хэлэлцэхэд Делсидо байлцсан хэмээжээ.

Тэрээр мөн Ерөнхийлөгч Дилма нь Марсело Дантас хэмээх шүүгчийг Дээд шүүхийн шүүгчээр томилж “Машин угаалга” ажиллагааг хариуцуулахаар оролдож байсан хэмээн мэдүүлсэн байдаг. Түүнчлэн Ерөнхийлөгч өөрөө Дээд шүүхийн дарга Ловиндонскийг дуудан уулзаж байсныг ч батлав. Ерөнхийлөгч Дилмад хандан Засгийн газарт “Машин угаалга”-ыг хянах зорилготой “Хямралын эсрэг” ажлын хэсэг байгуулах тухай саналыг ч Лула тавьж байсан удаатай гэнэ.

Эрх мэдлийн цайз гурав

Тухайн үеийн Ерөнхийлөгч Дилма Руссеф авлигын хэрэгт орооцолдоогүй үлдсэн ганц улс төрч гэхэд болно. Гэхдээ бүхнийг мэдсэн хэрнээ хараагүй юм шиг өнгөрөөсөн хэмээн түүнийг буруутгах хүмүүс олон. Тэрээр Ерөнхийлөгчийн сонгуульд нэр дэвшихээсээ өмнө Петробрасын Төлөөлөн удирдах зөвлөлийн даргаар 2003-2010 он хүртэл ажиллаж байсан. Тухайн жилүүдэд л авлига ид цэцэглэж байсан шүү дээ.

Хатагтай Руссеф бол Лула Ерөнхийлөгчийн үед Тамгын газрын даргаар нь ажиллаж байсан бөгөөд түүний баруун гар ямагт байсаар ирсэн. 2014 онд Дилма Хөдөлмөрчдийн намаас дахин нэр дэвшин Ерөнхийлөгчөөр хоёр дахь удаагаа сонгогдсоны дараа 15 сар болоод л Конгресст импийчментээр орсон гэдгийг бид бүгд мэднэ. Магадгүй Дилмаг зайлуулах улс төрийн шалтгаан байсан ч байж магад.

Тухайн цаг үед Бразилийн эдийн засаг тун хүндхэн байдалд ороод байв. Дилмагийн Засгийн газраас хэрэгжүүлж байгаа бодлогууд үр өгөөжгүй байсан тул ард иргэдийн эсэргүүцэл дээд цэгтээ хүрч газар сайгүй жагсаал цуглаан тасрахгүй үргэлжилнэ. Дилмаг зурагтаар яриад эхэлмэгц айл бүр цонхоо нээгээд түмбэн саваа балбадаг болсон байлаа. Ерөнхийлөгчөө эсэргүүцэж байгаа нь тэр. Энэ үеэр Дилмаг Засгийн газрын төсвийн зардлыг хэтрүүлэн хэрэглэсэн хэмээн буруутгаж, түүнд Конгресс итгэл үзүүлэх эсэх санал хураахаар зэхэж байсан юм. Гэхдээ зөвхөн Доод танхимын даргын шийдвэрээр Ёс зүйн хороо хуралдах ба хэрвээ хуралдах л юм бол Дилмаг импийчментэд оруулах эсэх асуудлыг хэлэлцэн шийдвэрлэнэ. Нэг ёсондоо Ерөнхийлөгч Дилмагийн хувь заяа Конгрессийн Доод танхимын дарга Эдвардо Куньяагийн гарт орчихсон хэрэг.

Гэтэл Куньяа маань өөрөө авлигын хэрэгт холбогдоод даргаасаа огцрох дээрээ тулаад дээсэн дөрөөн дээр дэнжигнэж байдаг. Дилмагийн танхимын гурван сайд, Доод танхимын давхар дээлтэй гишүүд саяхан Куньяаг огцруулахын эсрэг байр суурьтайгаа илэрхийлж байснаа хэдхэн хоногийн дараа шийдвэрээ огцом өөрчлөн огцруулахын төлөө эргэчихэж. Түүнчлэн Дилмагийн намын гишүүдээс Куньяаг Доод танхимын даргаас чөлөөлж өгөх хүсэлтийг илгээсэн байлаа. Энэ бүхэн Куньяаг ихээхэн бухимдуулан тэрээр Дилмагийн эсрэг импийчмент эхлүүлэхээр Ёс зүйн хороог хуралдуулах шийдвэрийг тэр даруй гаргажээ. Ийнхүү 2015 оны 12 сарын 2-нд Ерөнхийлөгчийг импийчментээр оруулах болсоныг ч Куньяа зарлав.

Энэхүү шийдвэр гарсаны дараа Дилма өөрийн 9 сайдын хамт хэвлэлийн бага хурал зарлаж ямар ч гэмт хэрэг үйлдээгүй, авлига аваагүй, гадаадын оффшор дансгүй гэдгээ мэдэгдэв. Тэрээр хууль ёсны дагуу сонгуулиар олонхийн санал аван гарч ирсэн гэдгээ ч хэлж ард түмэн түүнд итгэл хүлээлгээд байхад Төлөөлөгчийн танхимын даргын шийдвэрээр импийчмент эхлүүлэх нь эрх зүйн хувьд учир дутагдалтай хэмээн мэдэгдсэн ч тусыг эс олов.

2016 оны 4-р сарын 16-нд Доод танхимийн гишүүдийн олонх нь Дилмаг огцруулахыг дэмжиж, улмаар Дээд танхимаар хэлэлцэх болов. Харин Дээд танхимын гишүүдийн 22 нь Дилмаг дэмжсэн бол 55 нь огцруулахын төлөө товчлуур даржээ. Ийнхүү хатагтай Ерөнхийлөгчийн хувь заяа харамсалтайгаар шийдэгдэв.

Тун удалгүй Дээд шүүхийн шүүгч Заваский ноён Куньяаг гишүүнээс нь түдгэлзүүлэх шийдвэрийг гарган шалгасан бөгөөд Куньяа ямар нэгэн эсэргүүцэл үзүүлсэнгүй.

Үүнтэй зэрэгцээд Дээд танхимы дарга Ренан Галлейрос авлигын арваад төрлийн хэрэгт шалгагдаад эхлэв. Тэр ч байтугай түүнийг баривчлаад хэд хоногийн дараа сулласан юм. Ерөнхийлөгч, Конгрессийн хоёр танхимын дарга нар шил дараалан огцорлоо. Бразил Улс түүхэндээ хэзээ ч ингэтлээ удирдлагын гүн хямралд орж байсангүй. Улс орон эзэнгүй болсон мэт санагдах үе ч байлаа.

Ноён Эдвардо Куньяад 15 жилийн хорих ял шүүхээс оноожээ. Түүнийг 1,5 сая ам.долларын авлигын хэрэгт буруутгаж, улмаар Швейцарийн оффшор дансанд нуусан бүх мөнгийг нь улс хураан авсан юм.

Үргэлжлэл бий.

Ч.Сосормаа

Мэдээ, мэдээлэл / admintaf / 02/11/2017

“МАШИН УГААЛГА” цуврал нийтлэл #2

Шүүгч Сержио Морогийн ялалт

Авлигын хэргийн тухай эрэн сурвалжлах сэтгүүлч, зохиолч Владимир Нетогийн бичсэн “Машин угаалга” номын зорилго бол Бразилийн улс төр авлигадаа хэрхэн идэгдсэн, хичнээн бохир заваан болсон тухай өгүүлэх гээгүй болов уу. Харин хараат бус шүүх засаглал, өргөсөн тангарагтаа үнэнч шүүгчийн эр зориг шударга ёсыг хэрхэн эргүүлэн тогтоодог тухай өгүүлсэн ном юм. Тийм ч учраас эл номын хавтас эдүгээ сая сая бразилчуудын бахархал болоод байгаа залуухан шүүгч Сержио Морогийн зургаар гоёсон байдаг. Эл номын зохиогч, сэтгүүлч Владимир Нето нэг бус удаа “Моро бол бразилчуудын ёс суртахууны хэм хэмжээ, үлгэр дуурайл болсон хүн” хэмээн цохон тэмдэглэсэн нь номын үнэ цэнийг илэрхийлсэн төдийгүй шударга шүүх, шүүгчийн ёс зүйг өргөсөн хэрэг буй за.

Мөнгө угаах гэмт хэргийн их мастер Алберто Иойссеф төдийгүй Бразилийн нөлөө бүхий улс төрчид, бизнесийн магнатууд тэр ч байтугай ард түмний хайртай Ерөнхийлөгч асан Лулагийн эрлэг болсон шүүгч Сержио Фернандо Моро гэж хэн бэ?

Тэрээр Парана мужийн Маринга хотод жирийн багшийн гэр бүлд 1972 онд төржээ. Дунд сургуулиа төгсөөд мужийнхаа Их сургуулийн хуулийн ангид суралцан дүүргэж, 24 настайдаа шүүгчийн сонгон шалгаруултанд тэнцэн улмаар эрүүгийн хэргээр ажлынхаа гарааг эхэлсэн тэрээр 2003 оноос хойш мөнгө угаах гэмт хэргээр мэргэшсэн байна.

Тус улсад хэдэн жилийн өмнө мөнгө угаах гэмт хэргийн эсрэг тэмцэх сайн дурын бүлэг байгуулагдсан бөгөөд түүнд эрэн сурвалжлах сэтгүүлчид, хуульчид, иргэний нийгмийн зүтгэлтнүүд харъяалагдаж үе үе уулзалт, хэлэлцүүлэг зохион байгуулна. Тус бүлгийн үйл ажиллагаанд Моро идэвхийлэн оролцож илтгэл тавих дуртай байж.

2010 онд “Мөнгө угаах гэмт хэргийн тухай” номоо хэвлүүлсэн нь эдүгээ хуульчдын гарын авлага болжээ. Тус номондоо Бразилийн гурван шатны шүүх хүнд суртал ихтэй, цаг их алдсанаар хэрэг сунжирдаг тул авлигын хэрэгтнүүд хожиж, харин ард иргэдийг залхаахад хүргэдэг болохыг онцолжээ. Ялангуяа зохион байгуулалттай гэмт хэрэгтэй тулж ажиллахын тулд шүүхийг шинэчлэх шаардлагатай гэдгийг удаа дараа нотлон бичиж байв.

Сержио Моро бол үзэл бодолдоо үнэнч, хатуу чанд зарчимтай, эр зоригтой шүүгч. Харвардын их сургуульд “Мөнгө угаах зохион байгуулалттай гэмт хэрэг”-ээр мэргэшсэн түүнийг “Машин угаалга” ажиллагаа идэвхжих үеэр “Америкийн тагнуул” хэмээн хочилж нэг хэсэгтээ цуурав. Мэдээж энэ бол Морогийн нэр хүндийг унагах зорилготой эсрэг талын аргаа барсан үйлдэл байсан тул тэгсхийгээд намжив.

Моро нийслэл Бразилиа хотноо Дээд шүүхийн шүүгч Роза Веберийн туслах шүүгчээр жил гаруй хугацаанд ажиллахдаа “Менсалао” хэмээх мөнгө угаах гэмт хэргийн мөрдөн шалгах ажиллагааг хариуцаж багагүй туршлага хуримтлуулжээ. Дээд шүүхэд ажиллаж байхдаа өглөө 10 цагт ирж, орой 19 цагт ажлаасаа тардаг тэрээр хариуцсан ажлаараа бусдаас ялгарч Роза шүүгчийн анхаарлыг татаж амжсан гэдэг.

Түүнийг 2013 онд Парана мужийнхаа Дээд шүүхэд шүүгчээр томилогдон очих үед Росалво Франко хэмээх хурандаа цагдаагийн даргаар дэвшин ирсэнтэй цаг хугацааны хувьд таарчээ. Цагдаагийн шинэхэн дарга Мород хандан “Манай мужид мөнгө угаах гэмт хэргийг сүүлийн жилүүдэд илрүүлээгүй байгаа нь бид сайн ажиллаагүй гэсэн үг. Би таныг дэмжиж, цагдаагийн шинэ багийг бүрдүүлэн өгнө” хэмээн амласан нь түүний хувьд маш том дэмжлэг болсон аж.

“Машин угаалга” ажиллагаа авлигын цайзын хаалгыг ийнхүү дөнгөж тэмтчин нээж байх үед мужийн Прокурор Жозе Соарес гэгч муж бүхэнд салаалан сүлжээ үүсгэсэн энэ хэрэг нь Паранад хамаарахгүй тул нийслэл рүү шилжүүлнэ хэмээн мэдэгдсэн нь аянга буухтай адил болов.

Шүүгч Моро ба цагдаагийн багийнхан тус хэргийг муждаа шийдвэрлэх шаардлагатайг батлан, хүн хүч нэмэгдүүлэх хүсэлтээ төвдөө илгээсээр байлаа. Аз таарч нийслэлээс Ерөнхий Прокурорын газрын 34 настай, Харвардын их сургуулийн хуулийн ангийг саяхан төгссөн залуухан прокурор Делтан Далланол “Машин угаалга” мөрдөн шалгах ажиллагааны багийг Парана мужид үргэлжлүүлэн ажиллахыг дэмжиж, Ерөнхий Прокурорын газраас өөрийн биеэр хариуцах болсоныг мэдээлжээ.

Авлигын эсрэг тэмцэл бол зөвхөн мөнгөний эсрэг биш, эрх мэдлийн эсрэг тэмцэл юм. Тиймээс олон оронд, тэр дундаа хөгжиж буй улс орнуудад эрх мэдэлтнүүдийг ялан дийлж, яллан шүүх тохиолдол тун ховор. Чухамхүү “Машин угаалга” ажиллагааны амжилт бол цагдаа, шүүх, прокурор хамтран нэг баг болон ажиллаж чадсанд л байгаа болов уу. 1988 оны Үндсэн хуулиас хойш бэлтгэгдсэн шинэ үеийн хуульчид гар нийлэн хамтын багийг бүрдүүлэн ажилласан бөгөөд тэдний манлайлал авлигын эсрэг төдийгүй шүүх засаглалын шинэчлэлийг эрчимжүүлсэн юм.

Хамтарсан багийн анхны ялалт

Алберто Иойссефоор дамжуулан дараагийн сэжүүрийг цагдаагийнхан тун амархан атгаад авав. Тэдний дараагийн бай бол олон улсад нэртэй Петробрас хэмээх хий, газрын тосны төрийн өмчит корпорацийн Хангамжийн дэд захирал асан Пауло Роберта Коста байлаа. Иойссеф, Коста нар олон жил нөхөрлөсөн андууд. Андуудын ард бизнесийн ашиг сонирхол байсан нь мэдээж. Нарлаг нэг сайхан өдөр тэд хамтдаа зугаацан машин арилжааны газрын хажуугаар өнгөрөх үед “Нэг л өдөр би ийм машин унахыг мөрөөдөж байна” хэмээн цоо шинэ Рейнж Ровероос нүдээ ч үл салган Костаг хэлэхэд

-Яагаад заавал ирээдүйн нэг өдөр гэж би чамд одоо аваад өгье л дээ хэмээн Иойссеф хариулсан гэдэг. Маргааш нь найзынхаа мөрөөдлийн төмөр хүлгийг худалдаж авсан 250 мянган реалийн төлбөрийн баримтаа цахим шуудангаар нь илгээжээ. Коста хүссэн тоглоомоо ааваараа авахуулж чадсан жаахан хүү лугаа адил хөөрөн баярлаж байсан бол харин эхнэр нь сэтгэл зовниж байлаа. Магадгүй эмэгтэй хүний зургаа дахь мэдрэхүйгээр энэ машин сайныг авчрахгүйг зөгнөө биз. Үнэхээр ч энэ машины төлбөрийг Иойссеф төлсөнийг цагдаа нар даруй тогтоон Костаг баривчлах далим болгожээ.

Костаг баривчлах үедээ түүнийг бичиг баримтуудаа зөвлөх компанийнхаа өрөөнөөс авчрахыг шаардав. Гэтэл ааваасаа нууцаар үүрэг авсан охидууд нь дөрвөн хайрцаг бичиг баримтуудыг өрөөнөөс нь зөөж, устгасан нь цагдаагийн хараанд өртөв. Ийнхүү нотлох баримтуудаа устгасан нь түүний хамгийн том алдаа болсон гэдэг. Коста тэтгэвэртээ гараад тун удаагүй байсан бөгөөд газрын тосны чиглэлээр зөвлөх компани байгуулаад ажиллаж байсан юм. Түүнээс Алберто Иойссефийг таних уу хэмээн асуухад -Танина, гэхдээ бизнесийн холбоо байхгүй. Манай компаниас нэг удаа зөвлөх үйлчилгээ авч байсан. Түүнийхээ хөлсөнд надад машин авч өгсөн хэмээн хариулжээ.

Костагийн гэрт нэгжлэг хийхэд 180 мянган ам доллар, 10 мянган евро, 750 мянган реалийг олжээ. Гэрт нь ихээхэн хэмжээний бэлэн мөнгө байсан, хэргийн баримтуудаа устгасан болон хахуулийн машин авсан хэргээр түүнд шүүгч Сержио Моро яллах төлөвлөгөө бэлтгээд байв.

Бразилийн газрын тос, хий, шингэн түлшний бүтээгдэхүүн олборлон үйлдвэрлэдэг

Петробрас (Brazilian Petroleum Corporation) нь 1953 онд байгуулагдсан

төрийн өмчит компани юм. Эдүгээ Америк, Европ, Ази, Африкийн олон оронд хөрөнгө оруулалт хийн ажиллаж байгаа дэлхийд данстай том корпораци. Хувьцааных нь 54 хувийг Бразилийн Засгийн газар шууд эзэмшдэг бол Баялгийн сан, Хөгжлийн банкаараа дамжуулан 10 хувийг шууд бусаар нэмж эзэмшинэ. Өдөртөө 2,3 сая баррел тос олборлодог, жилдээ 87.0 тэрбумын орлоготой, 90 мянга шахуу ажиллагсадтай тус компанийн удирдлага улс төрчдийн гарт ороод уджээ. Тэгэхлээр Костагийн түүх бол хэн нэг шуналтай даргын тухай гэхээсээ илүү улс төрчид төрийн өмчит компаниар дамжуулан хэрхэн мөнгө саадаг тухай бүхэл бүтэн загварчлал болой.

Пауло Роберта Коста хийж бүтээх хүсэл тэмүүлэлдээ ид хөтлөгдсөн залуу байхдаа сонгон шалгаруулалтад амжилттай тэнцэн Петробраст анхлан хөл тавьсан аж. Тэрээр тус корпорацид 35 жил тасралтгүй ажилласан бөгөөд 1995 оноос хойш өөрийн идэвхи зүтгэлээр өсөн дэвшиж явлаа. Гэсэн ч ахлах ажилтнаас цааш тэрээр “шилэн тааз”-тай тулсан юм. Нүдэнд үл үзэгдэх энэхүү шилэн таазыг гагцхүү мэдлэг чадвараар нэвтлэн шатлан дэвших ямар ч боломжгүй. Энэ бол өөрөөс шалтгаалах асуудал биш тул дээрээс хэзээ, хэн түүнийг татахыг хүлээх үлдлээ. Тун удалгүй аз таарч Лулагийн Засгийн газрын үед Парана мужаас сонгогдсон Төлөөлөгчдийн танхимын гишүүн “Үндэсний дэвшил нам”-ын дарга Жозе Жанена дуудаж Хангамжийн газрын дэд даргын албыг хаших санал тавив. Мэдээж Коста ч дуртайяа зөвшөөрөв. Ийнхүү тэрээр Петробрасын Хангамжийн газрын дэд даргын албан тушаалыг Үндэсний дэвшил намын нөмөр нөөлөг дор 2004-2014 оны хооронд хаших боллоо. Коста ийнхүү улс төрийн утсан хүүхэлдэй болон хувирав. Түүнд өөр арга зам байсангүй. Учир нь Петробрасын удирдах албан тушаалуудыг намууд аль хэдийнэ хуваагаад авчихсан тул тэдний гар хөл нь болж байж л даргын албан тушаалд очих нь хэнд ч ойлгомжтой хэрэг.

Петробрасын бүх газар, хэлтсийг улс төрчид эрхшээгээд удаж буй. Тухайлбал: Засгийн эрх барьж буй Хөдөлмөрчдийн нам удирдлага, үйлчилгээ, хий ба эрчим хүч, олборлолт ба үйлдвэрлэл, санхүүгийн газруудын, Үндэсний дэвшил нам хангамжийн, харин Ардчилсан Хөдөлгөөний нам гадаад харилцааны газрын дарга ба дэд даргад төлөөний хүнээ томилуулдаг бичигдээгүй хууль үйлчилдэг.

Мөрдөгчид Костагийн өрөөнөөс нэг чухал баримт олжээ. Тэр их чамбай менежер байсан тул бүх зүйлээ бичиж тэмдэглэдэг зуршилтай. Тэрээр Петробрастай холбоотой ажилладаг хувийн компаниудыг хүснэгтэд байршуулан тэдний захирлын төдийгүй холбоотой ажилладаг ажилтнуудын нэрсийг жагсаан хамтран ажиллаж байгаа, эсвэл төлөвлөж байгаагаа ангилсан байж. Энэхүү хүснэгтээс мөнгө угаах хуйвалдаанд ямар компаниуд хэзээнээс хэр зэрэг жин даран оролцож эхэлсэн, эхлэх гэж байгааг төвөггүй ойлгож болно.

Нотлох баримтууд хангалттай бүрдсэн ч Коста үнэнээ мэдүүлэхээс эрс татгалзаж байв. Учир нь түүнийг нэг л өдөр хамсаатнууд нь суллуулах болно гэдэгт итгэлтэй байсан хэрэг. Үнэхээр түүнийг баривчлагдаад 59 хоносны дараа Дээд шүүхээс гэнэт суллах шийдвэр гарсан юм. Коста ч суллагдмагцаа хамгийн нэртэй сонингуудад өөрийгөө ямар ч буруугүй, хилс хэргээр хоригдож байгаад гарлаа хэмээн ярилцлага өгч эхлэв.

Түүний гэртээ хадгалж байсан бэлэн мөнгөний тухай асуухад -Хүн яагаад гэртээ бэлэн мөнгөтэй байж болохгүй гэж хариулсан гэдэг. Коста татвараас зайлсхийж, багахан мөнгийг гэртээ нууж байсан хөнгөн хэргээр өөрийгөө аргалах дотоод бодол агуулж байсан бололтой.

Костаг баривчлагдмагц Петробрасын нууц задарч эхэллээ. Нэр нь холбогдсон улс төрчид сандарч өөрсдийгөө ямар ч гэм зэмгүй хэмээн хэвлэлээр ээлжит ярилцлагаа өгсөөр байв.

Конгрессийн гишүүд авлигын хэрэгт олноор холбогдох болсон тул Конгресст “Машин угаалга” нэртэй Хяналтын сонсгол хийж эхэлжээ. Коста ч суллагдсаны дараа тус сонсголд очиж гишүүдийн асуултад хариулсан бөгөөд бүгд худлаа гүтгэлэг хэмээн дахин дахин батлан хэлж байлаа. Түүний хариултад олон гишүүд сэтгэл хангалуун үлдсэн гэдэг.

Дээд шүүхээс Костаг суллах төдийгүй “Машин угаалга” ажиллагааны бүх хэргийг Дээд шүүх рүү татан авах шийдвэрийг шүүгч Теори Заваский гаргасан байна. Шалтгаан нь Конгрессийн гишүүд олноор холбогдож эхэлсэн бөгөөд Үндсэн хуульд заасны дагуу Дээд шүүх л гишүүдийн хэргийг шалгах эрхтэй. Ийнхүү “Машин угаалга” эхлээд хоёр сар гаруй болоод хаагдах нь гэсэн битүүхэн айдас олон нийтийг түгшүүрт автуулав. Костаг сулласнаар бусад холбоотнууд нь ч удахгүй суллагдана гэдэгт итгэлтэй болов. Тэр дундаа Иойссеф бүр ч их хүлээлттэй байсан нь мэдээж.

Дээд шүүхээс Костаг суллах мэдэгдлийг хүлээн авсан Моро хүнд цохилтод орж, хаалгаа тас хаан, өрөөндөө өдөржингөө ганцаараа үлдэв. Тэр тун хүнд байдалд орсон байлаа. Морогийн найдвартай гараас хэргийг мултлан авч, нийслэл Бразилиад байрлах Дээд шүүхэд шилжүүлэх шийдвэр нь үйл явдлыг хачирхалтай болгов. Шалгагдаж байгаа Конгрессийн гишүүдийн өмгөөлөгчид хэдийнэ нэгдээд Дээд шүүхэд нөлөөлөх төлөвлөгөө бэлтгээд эхэлчихэж. Хамтарсан багийн нөр их хөдөлмөр ингээд төгсгөл болох гэж үү? гэх мэт элдвийн бодолд автсан Моро цайндаа ч оролгүй өдөржингөө компьютерт юм бичиж суусан байдаг.

Дээд шүүхийн шийдвэрийг мужийн Дээд шүүхийн анхан шатны шүүгч эсэргүүцэх эрх байхгүй тул ажлынхаа явцыг танилцуулан зааварчилгаа авах хүсэлт байдлаар албан бичгээ төлөвлөн шүүгч Заваскийд илгээжээ. Моро дээд шатны шүүхийн шийдвэрийг хүндэтгэн үзэж байгаагаа илэрхийлэхийн ялдамд нөгөө талаар Коста, улмаар Иойссеф, Кодама зэрэг мөнгө угаах гэмт хэргээр гаршсан этгээдүүдийг суллах нь нийгэмд хичнээн аюултай болохыг батлан ойлгуулахыг хичээв. Мэдээж дээд шатны шийдвэрийг өөрчлөнө гэдэгтээ итгэл муутай байсан биз. Анхан шатны шүүхээс ийм хүсэлт илгээх нь их л ховор тохиолдол. Гайхалтай нь Морогийн тайлбарыг уншаад Дээд шүүхийн шүүгч Теори Заваский шийдвэрээ өөрчилсөн төдийгүй нэмж найман хүнийг суллах гэж байсан төлөвлөгөөгөө ч зогсоосон аж.

Дээд шүүхийн таван шүүгчийн бүрэлдэхүүнтэй хуралдаанаар “Машин угаалга” ажиллагаанд орооцолдсон Конгрессийн гишүүдтэй холбоотойгоос бусад хэргүүдийг Парана Мужийн Дээд шүүхэд үргэлжлүүлэн шүүхийг зөвшөөрч улмаар Костаг баривчлах эрхийг эргэн Мород шилжүүлсэн нь бүрэн ялалт боллоо.

Авлигын сүлжээнээс атгасан барьцаа алдаад, амралтаа авчихаад байсан Моро энэхүү шийдвэрийг сонсмогц гэр бүлээрээ Испани руу аялах тийзээ тэр даруй цуцалсан бол оройны зурагтын мэдээ үзсэн Коста тэр шөнөдөө унтаж чадсангүй.

Анхны ялалтаа байгуулсан шүүгч Морог одоо хэн ч зогсоож чадахгүй нь тодорхой боллоо.

Үргэлжлэл бий.

Ч.Сосормаа

Мэдээ, мэдээлэл / admintaf / 01/11/2017

“МАШИН УГААЛГА” цуврал нийтлэл #1

Бразилийн улс төр, нийгмийг донсолгосон авлигын хэргийн тухай эрэн сурвалжлах сэтгүүлч, зохиолч Владимир Нетогийн бичсэн “Машин угаалга” ном 2016 онд хэвлэгдэж, тэр даруйдаа хамгийн гүйлгээтэй, шилдэг номоор шалгарчээ. Бразилийн нэр нөлөө бүхий улс төрчид, бизнесийн бүлэглэлүүдийн сүлбэлдсэн эл авлигын хэргийг 2014 оноос эхлэн шалгаж өнгөрсөн хугацаанд 232 хүнийг сэжигтнээр татаж, 160 хүнийг саатуулан хорьж, 10 тэрбум орчим ам.долларын хөрөнгийг царцаан, улс төрчдийн оффшор данснаас мөнгийг нь татан авч улсын орлого болгосоор байна. Миний бие Бразил Улсад ажиллаж байхдаа эл номын зохиогч Владимор Нетотой нөхөрлөн, номын гол баатар, шүүгч Сержио Моротой уулзах завшаан тохиосон бөгөөд “Машин угаалга” номын ерөнхий агуулга ба тухайн үеийн хэвлэлийн мэдээ болон улс төрчид, судлаач нарын сэтгэгдэл, дүгнэлтээс сийрүүлэн Та бүхэнд цувралаар хүргэж байна.

Оршлын оронд

Бразил бол савангийн хөөсөрсөн дуурийг амьдралд бүрнээ хэрэгжүүлж буй орон. Энэхүү “Машин угаалга” номонд өгүүлж буй хэний ч санаанд оромгүй, улс төрийн нарийн зохион байгуулалттай гэмт хэргийн цаад эзэд бол улс төрчид. Тэгэхлээр эл номонд гарч байгаа хүмүүс зохиомол баатрууд биш бодит хүмүүс бөгөөд тэдний ихэнх нь олон түмний танил, нэр нөлөө бүхий эрхмүүд. Эх оронч, ядууст энэрэлтэй, шударга, төрийн туршлагатай түшээ гэх тодотгол, цол гуншинтай тэд улс орныхоо нэрийн хуудас, ард түмнийхээ бахархал нь хэдийнэ болсон байжээ.

Тус номонд гарч буй үйл явдлууд нь тэртээх үеийнх биш, харин эдүгээ цагийнх бөгөөд одоо ч гэсэн үргэлжилж байгаа болно. Өөрөөр хэлбэл энэ номын өгүүлэмж нь та бүхэнд хэзээ нэгэн цагт болсон ямар нэг аймшигт хэргийн тухай дүрслэл биш, яг одоо улс төр хэмээх хаалттай хөшигний ард өрнөж буй гашуун үнэнийг илчилсэн баримтууд юм.

Зохион байгуулалттай авлигын хэрэг бол мөсөн уул лугаа адил. Мөсөн уулын орой л зөвхөн харагддаг, харин агуу том бие нь далайн уснаа далд байдаг. Ард түмэн улс оронд нь, тэр дундаа улс төрд авлига нэвчсэнийг мэдэрдэг авч, тэд авлига хэмээх асар том мөсөн уулын зөвхөн оройг харах төдий, нэг хэсэгтээ хэвлэлээр шуугиад өнгөрөхийг нь сонсоод л сураг алддаг. Улс төрчдийн элдэв зальжин тайлбар тэднийг тайвшруулж, тун үгүйдээ л эргэлзээнд хэсэгтээ автуулж, цаг хугацааны аясаар шуугиан намдсаар сааран мартагддаг бөлгөө.

Харин шүүхийн байгууллагаас авлигын хэргүүдийг баримт нотолгоотой илчлэх нь мөсөн уулын их биеийг уснаас суга татан ил гаргахтай адил буюу. Маш ихээр цочирдсон олон нийт -Арай ч дээ, үнэн гэж үү! хэмээн уулгалан нэг хэсэгтээ итгэж үл ядна. Заримдаа тэд жаахан хүүхдүүд шиг аашилна. Яг л аавыг нь хулгайч гэж хэлэхэд итгэхийг ч үл хүсэн уурлан дайрдаг хүү шиг хайртай улс төрчийнх нь хэргийг илчлээд байхад хамгаалан жагсаад, өмгөөлөн хаацайлаад байхыг яана. Ядуусын эцэг, үндэсний баатраа хамгаалсан мөн ч олон удаагийн цуглаан зохион байгуулагдсан даа, Бразил Улсад.

Орооцолдсон утасны үзүүрээс атгав

Бразилийн Парана зэрэг томоохон мужуудын шатахуун түгээх станцуудад валют солих замаар мөнгө угаах ажиллагаа борооны дараах мөөг шиг олширч байгаа тухай долоо хоног тутмын “Вежа” сэтгүүлд нийтлэгдэж эхлэв. Нийслэл Бразилиа хотын шатахуун түгээх зарим газрууд үндсэн ажлаа эрхлэхийн оронд кафе энэ тэрхэн ажиллуулсан шигээ оршин тогтносоор удаж байгааг цагдаагийнхан анзаарах болжээ. Бразилд шатахуун түгээх цэгүүд дэргэдээ авто угаалгын үйлчилгээ эрхлэх нь нийтлэг. Чухам эндээс “Lava Jato” буюу “Машин угаалга” хэмээх цагдаагийн операци нэршлээ олсон бөгөөд тун удалгүй олон жилийг дамнан үргэлжлэх “Зад угаах” ажиллагаа болно гэдгийг тухайн үед хэн ч төсөөлж байсангүй.

2014 оны 3-р сарын 15-нд Нелма Кодама хэмээх 48 настай валютын чейнж эмэгтэй хамсаатныхаа хамт Сан Пауло хотын Олон улсын нисэх онгоцны буудлаас баривчлагдсан хэрэг гарлаа. Тэрээр 200 мянган еврог дотоождоо нуун хил даван нисэхээр завдсан ажээ. Хатагтай Кодама нь мөнгө угаах ажиллагааны их мастер Алберто Иойссефтой тун чиг дотно харилцаатай төдийгүй олон жил түүнд үнэнчээр зүтгэж, гар хөл нь болсоор иржээ. Тиймдээ ч тэр 19 жилийн хорих ял авсан биз.

Яг үнэндээ Нелма баривчлагдсан учраас Иойссефийг мөрдөж эхэлсэн ч юм биш. 2013 оноос эхэлж цагдаагийнхан чейнжүүдийн гар утсыг чагнаж эхэлсэн байж. Тухайн үед тэдний анхаарлыг Карлос Чатер хэмээх шатахуун түгээх станцын эзэн залуу татаж байсан юм. 2013 оны 7-р сарын 28-ны өдөр Чатерийн утасны ярианаас Алберто Иойссефтой холбоотойг нь олж тогтоосон гэдэг. Үнэндээ түүний нэрийг олоход амаргүй байв. Учир нь чейнжүүд түүнийг “Примо” буюу “Том ах” хэмээн дууддаг байлаа. Харин нэг удаа Чатер түүнтэй ярьж байхдаа гэнэ алдаад Бето (Алберто гэсэн нэрийн товчлол) хэмээн дуудсан нь хар авхуулсан байна. Тэдний яриаг чагнаж байсан цагдаа нар Бето гэж хэн болохыг дуугаар нь хөөн төд удалгүй таньчихав. Ийнхүү мөнгө угаах сүлжээний цаад эзэн нь Алберто Иойссеф болохыг мэдмэгц шүүгч Сержио Мород хэргийг улам ухах сонирхол төрөөд явчихлаа. Учир нь тэд хуучны танилууд.

2005 онд Бразилийн улс төрчид тэр дундаа тухайн үеийн Ерөнхийлөгч Лула да Силва хүртэл орооцолдоод амжсан “Менсалао” нэртэй цагдаагийн операцийн үед Иойссефийг баривчлан хорьж байсан удаатай. Менсалао гэдэг нь тэтгэмж гэсэн утгатай үг. Засгийн эрхийг барьж байсан Хөдөлмөрчдийн намаас сар бүр Конгрессийн Төлөөлөгчдийн танхимын нөлөө бүхий гишүүдэд тухайн үеийн ханшаар 12 мянган ам.долларын хишиг хүртээдэг байжээ. Ийнхүү угжны депутатууд бий болсоноор эрх баригч намын хүссэн хуулийг дуу нэгтэй батлан дэмжих болсон юм. Харамсалтай нь энэхүү угжны мөнгө эрх баригч намаас бус, харин төрийн өмчит компаниудаас зар сурталчилгаа нэртэйгээр урсан гардаг байв. Аанай л улс төрчид төрийн өмчит компаниудыг өөрсдийнхөө “Саалийн үнээ” болгосон хэрэг. Тус хэргийг шүүн таслах үйл ажиллагаанд шүүгч Моро оролцож байсан бөгөөд Иойссефийг ч тэрээр яллажээ. Мөнгө угаах гэмт хэрэгт дахин оролцохгүй хэмээн ам өчгөө өгсөн Иойссеф хугацаанаасаа өмнө суллуулж байсан юм. Итгэл алдсан эртний танилтайгаа эргэн уулзах нь тодорхой болов. Түүний ард улс төрчид нуугдаж байгаа нь гарцаагүй.

2014 оны 3-р сарын 16-нд Парана мужийн Куритива хотын Холбооны цагдаагийн Эдийн засгийн гэмт хэрэгтэй тэмцэх хэлтсийн дарга Марсио Анселмо нь Алберто Иойссефийг баривчлах тушаалыг дахин нэг шалган үзээд цагдаа нартаа үүрэг өглөө. Түүнийг Сан Пауло дахь 3,8 сая реалийн үнэтэй тансаг ордноос нь баривчлахаар дөрвөн цагдаа ойрмогхон буудалд тэр өдрийн оройдоо байрлав. Цагдаа нар хэрхэн баривчлах тактикаа ярилцан дахин дахин нягталсаар хоножээ. Маргааш өглөө нь үүрээр хоёр цагдаа машинтайгаа гадаа харуулд гарч, харин хоёр нь гэр рүү шууд нэвтэрч баривчлахаар тохиролцов. Маш хурдан хугацаанд гэрт нь орохгүй бол байрны харуул сэжиг авч эзэндээ мэдээлнэ. Сэжиг авбал баримтуудаа устган зугатах эрсдэлтэйг ч тэд мэдэж байлаа. Алберто Иойссеф бол долоо буудуулсан хашир чоно. Тэрээр олон машинтай төдийгүй хэд хэдэн нисдэг тэрэг бас усан онгоцтой. Зүг чигээ буруулахдаа гарамгай нэгэн.

Цагдаагийнхан төлөвлөгөө ёсоор өглөөний 6 цагт баривчлахаар очсон ч тэрээр шөнөдөө гэрээсээ явчихсан байлаа. Түүний эзэмшдэг зуун гар утасны нэг Сан Пауло хотын нисэх онгоцны буудалд хальт нээгдээд тасарсан мэдээтэй. Харин маргааш нь Маранао мужид сураг гарах нь тэр.

3-р сарын 17-нд Иойссеф Маранаогийн таван одтой хамгийн тансаг буудалд туслах залуугийнхаа хамт хоёр хар цүнхтэй хүрэлцэн ирлээ. Түүнд яагаад ч юм түгшүүр төрж байсан ч нүдэнд нь сэжигтэй зүйл үзэгдсэнгүй. Эл өдөр түүний амьдралд байдаг л нэг ажлын өдөр ба цүнхэнд нь мужийн эрх баригчдад дамжуулах ёстой 1,4 сая реал бэлнээр яваа.

Бразилийн барилгын томоохон компаний нэг “UTC” тус мужид 2013 оны 11-р сараас эхлэн концессийн гэрээгээр бүтээн байгуулалтын ажил эхлээд байлаа. Мужийн захиргаанаас сар бүрийн 4,7 сая реалийн төлбөрийг 24 удаа цувуулан авах тохиролцоо хийжээ. Гэрээ хийх үйл явц зургаан сар сунжран үргэлжилсэн гэнэ. Бүтээн байгуулалтын ажил дуусах дөхөж байгаа ч төлбөр цаг хугацаандаа хийгдэхгүйгээс шалтгаалан ажил зогсонги байдалд орсон байв. UTC компани 113 сая реалийн төлбөр нэхэмжлэн шүүхэд хандаад буй. Тус компанийн захирал Рикардо Пессоагийн гуйлтаар Алберто Иойссеф Маранао мужийн удирдлагатай уулзаж учрыг олохын тулд энд иржээ. Учрыг олох ч юу байх вэ. Шуудхан хэлэхэд хахуулийн мөнгө өгөөд ажлыг нь бүтээх үүрэгтэй. Иойссеф өмнө нь авлигын мөнгө тэдэнд дамжуулж байсан тул тэд өгч аваад гаршчихсан улс.

Маранао бол Бразилийн зүүн хойд хэсгийн ядуухан муж. 6 сая гаруй хүнтэй тус мужийн засгийн эрхэнд Ерөнхийлөгч асан Сарнейн гэр бүлийнхэн олон жил ноёрхжээ. Амбан захирагчаар түүний охин Росеана Сарней ажиллаж байсан үе. Чухам тэр хатагтайд энэхүү цүнхтэй мөнгө очиж ужгирсан асуудлыг шийдэх ёстой байлаа.

Холбооны цагдаагийн газрынхан Иойссефийн араас мөшгиж түүний байрлаж буй буудлын хүлээн авах руу залган лавлав. Гай таарч хүлээн авагч эмэгтэй Иойссеф руу шууд холбоод өгчихлөө. Балмагдсан цагдаагийн ажилтан Иойссефтой хальт мэндлээд утсаа тасалчихав. Сэжиг авсан Иойссеф доош яаран буун ямар дугаараас залгасныг нягтлан асуулаа. Куритива хотын кодтой тус дугаар уруу нь буцаан залгаж, Цагдаагийн газар болохыг түвэггүйхэн мэдчихэв. Цагдаа нар үүрээр баривчилдагийг тэр мэднэ. Түүнд зугатах хугацаа байсан ч асуудалтай нүүр тулахаар шийдлээ. Угаасаа нэг л өдөр баривчлагдах нь тодорхой. Харин мөнгөтэйгээ л баригдахгүй юм шүү. Тэрээр шөнийн 03:30 цагт нэг цүнхэндээ бүх мөнгөө чихээд хамт яваа туслахынхаа өрөөнд чимээгүйхэн орлоо. -“Хэрвээ надад ямар нэг зүйл тохиолдвол Амбан захирагчийн Тамгын газрын дарга эмэгтэйд энэ цүнхийг дамжуулаарай” хэмээв.

-“Танд ямар нэг зүйл тохиолдоо юу” хэмээн гайхан асуухад: -“Үүрээр би зочин хүлээж авах байх” гэж хэлээд гарав.

Цагдаа нарыг өглөөний 6 цагаас арай өмнөхөн өрөөнд нь нэвтрэн ороход Иойссеф гадуур хувцастайгаа хүлээн сууж байсан ба ямар ч эсэргүүцэл үзүүлээгүй тул гавлах ч шаардлага гарсангүй. Биенд нь нэгжлэг хийхэд долоон гар утас олдсон гэнэ. Дараа нь түүний “GFD” хөрөнгө оруулалтын зөвлөх компаний өрөөнөөс 27 гар утас олдов. Цагдаа нар 100 гаруй гар утаснаас зөвхөн 35 дугаарыг мэддэг байж. Тэрээр харилцаатай улс төрч бүрдээ нэг дугаар нээсэн бөгөөд зөвхөн тэр дугаараасаа л харьцана. Иойссеф бол “нэг хүнд - нэг утас” хэрэглэдгээрээ алдаршсэн этгээд.

Туслах залуу өглөө нь тайвуу босож, цүнхээ аван гарч одсон бөгөөд үдээс хойш гар хоосон буцан иржээ. Харин маргааш нь Мужийн захиргаанаас 4,7 сая реалийг “UTC” компанийн дансанд шилжүүлсэн байдаг.

“Машин угаалга” ажиллагаа нь мөнгөний хэмжээ ба түүнд орооцолдсон нэр нөлөө бүхий улс төрчдийн тоогоороо Бразилд төдийгүй дэлхийд ч толгой цохих авлигын хэрэг болон түүхэнд бичигдэх нь зайлшгүй байх. Чухамхүү энэ хэрэг Алберто Иойссефийн баривчилгаагаар эхэлсэн гэхэд болно. Уулын уруу эрчээ аван өнхрөх цасан бөмбөлөг хэр томордогийг цастай газрын хүмүүс бол мэднэ дээ. Гагцхүү Иойссеф тэр эрчлэн өнхрөх цасан бөмбөлгийн цөм буюу хөврөн орооцолдох хэргийн үзүүр байсан гэдгээ өөрөө ч гадарлаж байсан биз.

Иойссеф өмгөөлөгч рүүгээ тэр өглөөдөө залгасан байдаг. -Моро чамайг баривчлаа юу? хэмээн өмгөөлөгч анхныхаа асуултаар ам нээв. Тэр хариуд нь -Энэ удаагийнх бол чиний бодож байгаа шиг дан ганц миний асуудал биш. Энэ бол Конгрессийг тэр чигт нь донсолгох асуудал хэмээн хариулсан гэдэг.

Бразилийн нэр нөлөө бүхий улс төрчдийн итгэлийг олон жил хүлээн арын албыг залгуулан авлигын мөнгийг нь зөөдөг Иойссеф бол их гарын эр байлаа. Тэр өөрийгөө хэнээс ч үл айдаг эр хүн гэх боловч ганцхан хүнээс л цэрвэж явдагаа хожмоо сэтгүүлчдэд ярьжээ.

Түүний зүрхэнд орсон тэр хүн бол шүүгч Сержио Моро. Учир нь түүнээс зугатаах гарц байхгүй гэдгийг Иойссеф баттай мэднэ.

Үргэлжлэл бий.

Ч.Сосормаа